ආණ්ඩුක්‍රම ව්‍යවස්ථා සම්පාදනය – නිමල් කොළඹිස්ස – මහනුවර
මලවතු හා අස්ගිරි පාර්ශවයේ මහා නායක හිමිදෙනම සාකච්ඡා කිරීමෙන් අනතුරුව ආණ්ඩුක්‍රම ව්‍යවස්ථාව සමබන්ධයෙන් ජනාධිපතිවරයා වෙත විවෘත ප්‍රකාශයක් ඉදිරිපත් කරන බව අස්ගිරි පාර්ශවයේ ලේඛකාධිකාරී පූජ්‍ය මැදගම ධම්මානන්ද හිමියන් පවසයි.
පවතින ව්‍යවස්ථාවක් සංශෝධනය කිරීම හෝ නව ව්‍යවස්ථාවක් සම්බන්ධයෙන් මහා නායක හිමිවරුන් ඒකාබද්ධ සාකච්ඡාවක් කිරීමෙන් අනතුරුව පොදු එකඟත්වයකට එළැඹීම සුදුසු බව ලේඛකාධිකාරී හිමියන් පැවසූහ.
අස්ගිරි පාර්ශවයේ ලේඛකාධිකාරී හිමියන් මේ බව සඳහන් කරන ලද්දේ දේශහිතෛෂී ජාතික සංවිධාන එකමුතුවේ නියෝජිතයන් අද (31) පෙරවරුවේ අස්ගිරි පාර්ශවයේ මහා නායක හිමියන් බැහැ දැක ව්‍යවස්ථාව සම්බන්ධයෙන් කළ දැනුවත් කළ අවස්ථාවේදිය.
පාර්ලිමේන්තු මන්ත්‍රී හිටපු අමාත්‍ය සරත් වීරසේකර, නැගෙනහිර පළාත් ආණ්ඩුකාර අනුරාධා යහම්පත්, හිටපු අග්‍රාමාත්‍ය ලේකම් සුදත් ගුණසේකර, වෛද්‍ය කපිල ගුණවර්ධන යන මහත්වරු ඇතුලු පිරිසක් ව්‍යවස්ථාව සම්බන්ධයෙන් මහා නායක හිමියන් දැනුවත් කිරීම මෙහිදී සිදුවිය.
මේ වන විට නව ව්‍යවස්ථාවක් සම්පාදනය කොට ඇතැයි කී හිටපු අමාත්‍යවරයා, ඒ වෙනුවට 13 ව්‍යවස්ථාව ක්‍රියාත්මක කරන්නේ නම් ගැටලු රැසක් මතුවිය හැකි යැයි පෙන්වා දුන්නේය. නමුත් රටට උචිත අයුරින් ව්‍යවස්ථාවක් සකස් කොට ඇති බවකී ඒ මහතා, ජාතික ආරක්ෂාවට ප්‍රමුඛත්වය ලබා දීම වඩා වැදගත් යැයි ද කීවේය.
යුද්ධය නිමාවීමෙන් අනතුරුව කිසිදු ත්‍රස්තක්‍රියාවක් සිදුනොවීමෙන් පෙනී යන්නේ මෙරට ජාතික ආරක්ෂාවට රජය ගෙන ඇති තීන්දු තීරණ යැයි කී ඒ මහතා රට දියුණු කිරීම හා මහජන සුභසාධනය වෙනුවෙන් වැඩසටහන් රැසක් ක්‍රියාත්මක කළ බව ද කීහ.
හමුදාව යටතේ පැවැති ඉඩම්වලින් 95%ක් යළි මහජනයා‍ට ලබාදි ඇතැයි කී ඒ මහතා පලාලි ගුවන් හමුදා කදවුර ආසන්නයේ ඉඩම්වල පවා මහජනයා යළි පදිංචි කළ බව ද කීහ.
අස්ගිරි පාර්ශවයේ අනුනායක පූජ්‍ය ආණමඩුවේ ධම්මදස්සි හිමි, මුතියංගණ රජමහ විහාරාධිපති ආචාර්ය මුරුද්දෙණියේ ධම්මරතන හිමි, කාරක සංඝ සභික පූජ්‍ය ගොඩගම මංගල හිමිවරුන් අස්ගිරි පාර්ශවය වෙනුවෙන් මෙහිදී පෙනී සිටියෝය.
ජාතික සංවිධාන එකමුතුව වෙනුවෙන් මුලතිව් කුරුන්දි රජමහ විහාරාධිපති පූජ්‍ය සත්තා බෝධී හිමියන් ද කීර්ති වික්‍රමරත්න, නීතිඥ කල්‍යාණ තිරාණගම, වසන්ත බණ්ඩාර යන මහත්වරුන් ද මේ අවස්ථාවට එක්වුහ
