වෙනස් ආකාරයේ නත්තල් සැමරුමක් – මෙලනි මානෙල් පෙරේරා

“නත්තල එන්නේ අවුරුද්දකට එක වතාවයි. නමුත් මේ අවුරුද්දේ නත්තල අපි හැමදෙනාටම සමරන්න වෙලා තියෙන්නේ රටේ ගොඩාක් ප්‍රශ්න තියෙනකොට. වෙනදා කරනවා වගේ මේ පාර නත්තලට අපිට රස කෑම හදලා දෙන්න, ලස්සණ ඇඳූමක් අරන් දෙන්න, තෑගි අරන් දෙන්න අපේ දෙමාපියන්නට බැහැ. මෙදාපාර අපේ නත්තල් ගස් අපේ දුකෙන් බරවෙලා” යැයි නත්තල් උත්සවයක කැරොල් ගායානා කළ ළමුන් කිහිප දෙනෙකු පැවසීය.  

“රටේ තිබෙන ආර්ථීක ප්‍රශ්නය සහ නොයෙක් ආකාරයේ ගැටලු සහගත තත්ත්වයන් නිසා මේ නත්තල් උත්සවය අද අපි ඉතාම සරළ විධියට සමරනවා. එහෙත් එහි පණිවුඩය ඉතා ගැඹූරුයි.  අපේ විශ්වාසය අනුව අපි අදහන දේව පුත්‍රයා අප අතර ජීවත්වන්නට පැමිණීම තමයි නත්තල දි සිහිකරන්නේ. දේව පුත්‍රයා අපිත් එක්ක ජීවත්වෙන්න ආවා කියන්නේ අපි කුමන තරාතිරමක ම ජීවත්වුනත් අපි වටිනා මිනිස්සු. ඒ නිසා අපි ඔක්කෝම එක වගේ අය. උසස් පහත් කියලා වෙනසක් නැහැ. ඒ වගේ ම, අපි හැම කෙනා තුළ ම දෙවියෝ ඉන්නවා. ඒ නිසා අපි ඒ දෙවියන්ට ආදරය කරන්න ඕනේ අනික් අයට ආදරය කිරීම තුළින්. අනික් අය සමග, නැති බැරි අය සමග බෙදා හදා ගැනීම තුළින් ඒ දෙවියන් සමාජය තුළ ජීවමාන කරවන්න ඕනේ”. යැයි රොහාන් සිල්වා පියතුමා පැවසීය.   

පුද්ගල සහ කණ්ඩායම් වශයෙන් ඉදිරිපත් කරන ලද සිංහල සහ ඉංග්‍රිසි භාෂාවලින් යුත් නත්තල් කැරොල් ගායනා කිහිපයක් අවසානයේ දි, පිච්චමල්වත්ත ළමා සංවර්ධන වැඩසටහනේ සම්බන්ධීකාරක සනත් ප්‍රනාන්දු විසින් උත්සව සභාව ඇමතීය.

“රටේ ළමුන්ගෙන් වයස අවුරුදු 05ට වඩා අඩු, සියයට 50ක් මන්දපෝෂණයෙන් පෙළෙනවා. ඒ වගේම සාමාන්‍ය දරුවන්ගෙන් සියයට 15 ක් මන්දපෝෂණයෙන් පෙළෙනවා. කන්න නැතිව ලක්‍ෂ 63ක් සිටිනවා. මෙවැනි වටපිටාවකදී තමයි මෙවර අපි දෙවිදුන්ගේ උපත සිහිකරන්නේ. මේ තත්ත්වයන් වෙනස් කරන්න අපි ප්‍රඥාවන්තව කටයුතු කරන්න ඕනේ” යැයි ඔහු කීවේය.

පිච්චමල්වත්ත ළමා සංවර්ධන වැඩසටහන, පිච්චමල්වත්ත ප්‍රදේශයේ ජීවත්වන අඩු ආදායම් ලාභි පවුල්වල පාසැල් යන දරුවන් සඳහා නොමිලයේ අධ්‍යාපනය ලබාදීමට මරදාන සමාජ හා සාමයීක කේන්ද්‍රය මගින් පවත්වාගෙන යනු ලබන වැඩසටහනකි.