පවෙල් සාමිවරයාගේ 168වන උපන්දිනයට ශ්‍රී ලංකාවෙන් තෑග්ගක් — මෙලනි මානෙල් පෙරේරා 

පෙබරවාරි මස 22 දින බාලදක්‍ෂ ව්‍යාපාරයේ නිර්මාතෘ රොබට් බේඩන් පවෙල් සාමිවරයාගේ 168 වන උපන්දිනය යෙදී තිබුණු අතර, එය සමරනු වස්, ශ්‍රී ලංකා බාලදක්‍ෂ දරුවන් රටවටා ඇති දුම්රිය ස්ථාන 150ක් පවිත්‍ර කිරීමේ සද්කාර්යයක යෙදුණි. පසුගිය සෙනසුරාදා – 22 වනදා පැවැත්වූ එම සද්ක්‍රියාව සඳහා පළාත් බාලදක්‍ෂ නියමුවරයන් හා දෙමාපියන් ද සහභාගී වූහ.  

සිය නිර්මාතෘවරයාගේ ජන්ම දිනය සනිටුහන් කරමින්, කොළඹ – කොටුව දුම්රිය ස්ථානය  ප්‍රමුඛව මරදාන, කොම්පඤ්ඤවීදිය , මොරටුව සහ ගල්කිස්ස දුම්රිය ස්ථානයන් පවිත්‍ර කිරීමේ කටයුත්තෙහි බාලදක්‍ෂ ළමුන් 700කට අධික පිරිසක් සම්බන්ධ වූහ. බාලදක්‍ෂ සංගමයේ සභාපති බ්‍රිගේඩියර් ජේ ඒ පී  ජයවර්ධන මහතාගේ ප්‍රධානත්වයෙන් උතුරු පළාතේ අනුරාධපුර දුම්රිය පළ පවිත්‍ර කිරීම සිදුවූ අතර, නැගෙනහිර පළාතේ මඩකළපුව, අක්කරෙයිපත්තු සහ කල්මුණේ බාලදක්‍ෂ දිස්ත්‍රික්ක එක්ව මඩකළපුව දුම්රිය ස්ථානය අලංකරණය කිරීමේ ව්‍යාපෘතියක් ද, ඌව පළාතේ – බදුල්ල සිට ඔහිය දක්වා දුම්රිය ස්ථාන 09ක් පවිත්‍ර කිරිමේ වැඩසටහනක් ද දකුණු පළාතේ බෙන්තර සිට අහංගම දක්වා දුම්රිය ස්ථාන 33ක් පවිත්‍ර කිරීමේ  වැඩසටහනක් ද  මෙදින දවස පුරා දියත් කෙරිණි. 

සාමිවරයාගේ ජන්ම දිනයට සමගාමීව, ශ්‍රී ලංකාව තුළ වත්මන් ආණ්ඩුව විසින් මේ දිනවල ක්‍රියාත්මක කරනු ලබන “ක්ලීන් ශ්‍රී ලංකා” වැඩසටහනට සහය දක්වමින් , “ක්‍රියාවෙන් ආදර්ශය”, දවසේ ආදර්ශ පාඨයට අරුතක් දෙමින් දිවයින පුරා විසිරී සිටන බාලදක්‍ෂ දරුවන් විසින් සියලු දුම්රිය ස්ථාන පිරිසිදූ කිරීමේ උතුම් ක්‍රියාව සංවිධානය කළ බව, වත්තල – ජාඇල කළාපයේ නිමල මරිය බාලිකා මහ විදුහලේ  බාලදක්‍ෂ නායිකා, තිළිණි මහේෂා කන්නන්ගර මෝජෝ පුවත් හා ප්‍රකාශ කළේය.

තවද, මෙම වැඩසටහන මෙදිනට පමණක් සීමා නොවන අතර, වසර පුරාම බාලදක්‍ෂ දරුවන් එක්ව ව්‍යාපෘතියක් ලෙස, හැමවිටම සිය ආදර්ශ පාඨයට පණපොවමින් ජාති , ආගම් භේද, වයස් භේද, උස් පහත් – ලොකු පොඩි භේද කිසිවක් නැතිව, කණ්ඩායම් හැගීම තුළ එකමුතුකමින් යුතුව ආදර්ශමත් කාර්යයන්වල නිරතවීම සහ අවසානයේ එයින් සතුටක් ලැබීම බාලදක්‍ෂ ව්‍යාපාරයේ අරමුණ යැයි ද ඇය කීවේය.

“අපගේ නිර්මාතෘ එංගලන්තයේ ඉපැදුණත්, පසුකාලිනව සේවය කිරිමට ඉංදියාවට ගියා, දකුණු අප්‍රිකාවට ගියා. එහිදි එතුමා දුටුවා ළමුන්ට විශාල සේවයක් කරන්නට හැකි බවත් නමුත් වැඩිහිටියෝ ඒ සඳහා අවස්ථාව ළමුන්ට නොදුන් බවත්. එම නිසා තමයි එතුමා මේ බාලදක්‍ෂ ව්‍යාපාරය ආරම්භ කරලා තරුණයින්ට සහ ළමුන්ට අවස්ථා ඇතිකර දුන්නේ තමන්තුළ ස්වයං පාලනයක් තුළින් සමාජයට සේවයක් කරන්න.” යැයි ශ්‍රී ලංකා බාලදක්‍ෂ සංගමය‌ේ  උප සභාපති ගරු කේ.එච්.කේ. පෙරේරා සහෝදරතුමා පැහැදිළි කළේය.

“බාලදක්ෂයින් ලෙස අපි කරන මේ කුඩා ක්‍රියාවන් හරහා, වැඩිහිටියන් ඇතුළු සමාජයට පෙන්වමු අපි පොදු දේපළ – පරිසරය ආරක්ෂා කර පිරිසිදු කරන බව. ඔබත් එසේ කිරීමට පියවර ගත යුතුයි කියන පිවුඩය ලබාදෙමු.” යැයි  ගරු  සහෝදරතුමා ආරම්භයේදී ම පහදා දුණි.