යාවත්කාලීන කරන පරිසර පනත ඉදිරි මාස දෙක තුළදී පාර්ලිමේන්තුවට ඉදිරිපත් කිරීමේ සැලසුම් – නදීක දයා බණ්ඩාර

 

 

පරිසර පනත යාවත්කාලීන කොට නව පනත්  කෙටුම්පතක් වශයෙන්  ඉදිරි මාස දෙක තුළදී පාර්ලිමේන්තුවට ඉදිරිපත් කරන බව පරිසර අමාත්‍ය කෙහෙළිය රඹුක්වැල්ල මහතා පවසයි.

පරිසර නීතිය බලාත්මක කිරීමේ අරමුණුන් පවතින අඩු ලුහුඬුකම් නිරාකරණය කිරීම  සඳහා එම පනත  යාවත්කාලීන කරන බව අමාත්‍යවරයා තවදුරටත් පැවසුවේය.

උදාවූ නව වර්ෂයේ මහනුවර සම්බන්ධීකරණ කාර්යාලයේ රාජකාරී ආරම්භ කිරීම පරිසර අමාත්‍යවරයාගේ ප්‍රධානත්වයෙන් අද (07) ආරම්භ වූ අතර එහිදී පැවති උත්සවයේදී අමාත්‍යවරයා මේ බව කීවේය.

ආගමිකවතාවත් සඳහා මුල් තැන ලබාදෙමින් කාර්යාලයේ රාජකාරී ආරම්භ කිරීම සිදුවිය.

පරිසර පනත මෙන්ම පරිසරය හා සම්බන්ධ තවත් පනත් කිහිපයක් කාලීන වශයෙන් බලාත්මක විය යුතු යැයි එහිදී කී අමාත්‍යවරයා පරිසරය ආරක්ෂා කර ගැනීම කෙරෙහි කලාපීය වශයෙන් අවධානය යොමුවී ඇතැයි සඳහන් කළේය.

දේශගුණික විපර්යාස හේතුවෙන් විවිධ පාරිසරික ගැටලු මතුවී ඇති නමුත් ඒ සියල්ල නිරාකරණය කර ගැනීම සඳහා පවතින අණ පනත් යාවත්කාලීන විය යුතු යැයි ද අමාත්‍යවරයා පෙන්වා දුන්නේය.

ලෝකය මුහුණ දෙන ගැටලු අතරින් පරිසරය විෂය අද වන විට දෙවැනි වන්නේ මුදල් හා භූගෝලීය දේශපාලනය යන විෂයට පමණක් යැයි ද අමාත්‍යවරයා තවදුරටත් සඳහන් කළේය.

මහා සංඝරත්නයේ පිරිත් සජ්ඣායනා මධ්‍යයේ නව කාර්යාලයේ වැඩ කටයුතු ආරම්භ වූ අතර එම අවස්ථාව සඳහා මධ්‍යම පළාත් ප්‍රධාන ලේකම් අජිත් ප්‍රේමසිංහ, මහනුවර දිස්ත්‍රික් ලේකම් චන්දන තෙන්නකෝන්, කුණ්ඩසාලේ ප්‍රාදේශීය ලේකම් සමන්ති නාගස්තැන්න, මිනිපේ ප්‍රාදේශීය ලේකම් නුවන් සී. හේමකුමාර යන මහත්ම මහත්මීන් ඇතුළු පිරිසක් සහභාගි විය.

 

Leave a Reply

Your email address will not be published. Required fields are marked *