ඩෙංගු රෝගීන්ගෙන් සියයට 30ක් දරුවන් – දෙමාපියන්ට අනතුරු ඇඟවීමක් ( මෙලනි මානෙල් පෙරේරා )
2023 වසරේ වාර්තා වූ සමස්ත ඩෙංගු රෝගීන්ගෙන් සියයට 30ක් පමණ වයස අවුරුදු 1ත් 18ත් අතර වයස් කාණ්ඩයේ අය බව සෞඛ්‍ය විශේෂඥයෝ පවසති.
ජාතික ඩෙංගු මර්දන ඒකකයේ වෛද්‍ය නලින් ආරියරත්න මහතා කළ ප්‍රකාශයකට අනුව ඩේලි මිරර් පුවත්පත කළ විමසුමකට පිළිතුරු දෙමින් විශේෂඥ වෛද්‍යවරයකු මේ බව අනාවරණය කළ බව ඩේලි මිරර් පුවත්පත සඳහන් කරයි.
පාසල් සිසුන්ගෙන් සැලකිය යුතු ප්‍රතිශතයක් ඩෙංගු රෝගීන් බවට හඳුනාගෙන ඇති බවද පැවසේ.
ඩේලි මිරර් වෙත අදහස් දක්වමින් රිජ්වේ ආර්යා රෝහලේ (LRH) අධ්‍යක්ෂ වෛද්‍ය ජී. විජේසූරිය පැවසුවේ මේ වන විට ළමුන් 30 කට වැඩි පිරිසක් තම රෝහලේ ප්‍රතිකාර ලබන බවයි.
මීට අමතරව, පසුගිය වසරට සාපේක්ෂව ළමුන් අතර ඩෙංගු රෝගීන්ගේ සීඝ්‍ර වර්ධනයක් දක්නට ලැබෙන බවත්, එබැවින් ඒ පිළිබඳව අවධානය යොමු කරන ලෙස දෙමාපියන්ගෙන් ඉල්ලා සිටින බවත් ළමා රෝග පිළිබඳ විශේෂඥ වෛද්‍ය දීපාල් පෙරේරා මහතා ඩේලි මිරර් වෙත පැවසීය.
වසංගත රෝග විද්‍යා අංශයට අනුව 2023 වසරේ රෝගීන් 43,346ක් වාර්තා වී ඇති අතර, වැඩිම රෝගීන් සංඛ්‍යාව ගම්පහ දිස්ත්‍රික්කයෙන් 9,638ක්.
බස්නාහිර පළාතෙන් රෝගීන් 21,654 කට අධික සංඛ්‍යාවක් වාර්තා වී ඇති අතර එය පළාත අනුව වැඩිම සංඛ්‍යාවයි. ඩෙංගු බෝවන ස්ථාන බහුලව දක්නට ලැබෙන අධි අවදානම් MOH ප්‍රදේශ 67ක් වසංගත රෝග විද්‍යා අංශය විසින් හඳුනාගෙන ඇත. ජුනි මාසයේදී ද ඩෙංගු රෝගීන් 4,000 කට ආසන්න සංඛ්‍යාවක් වාර්තා වී තිබේ.
මේ අතර, 2023 ජනවාරි සිට මරණ 25 ක් වාර්තා වී ඇත. මෙම සන්දර්භය තුළ, ඩෙංගු වළක්වා ගැනීම සඳහා තම අවට පරිසරය පිරිසිදුව තබා ගැනීමට සහ මදුරුවන් බෝවන ස්ථාන විනාශ කරන ලෙස ජනතාවගෙන් ඉල්ලා සිටී.
