රජය සමග අත් වැල් බැදගන්න අගමැති ඉල්ලයි – නිමල් කොළඹිස්ස – මහනුවර
සර්ව පාක්ෂික ආණ්ඩුවක් පිහිටුවීම සඳහා දේශපාලන භේදයෙන් තොරව සියලු දෙනාට එක්වන ලෙස ආරාධනා කරන බව අග්‍රාමාත්‍ය දිනේෂ් ගුණවර්ධන මහතා පවසයි.
පාර්ලිමේන්තු පළමු සැසි වාරයේදී ජනාධිපතිවරයා විසින් ඒ සඳහා සියලු පක්ෂවෙත ඇරයුම් කරන බව ද ඒ මහතා කීවේය.
මහනුවර පැමිණි අග්‍රාමාත්‍යවරයා, ශ්‍රී දළදා මාලිගාවේදී දන්ත ධාතූන් වහන්සේ වැද පුදා ආශිර්වාද ලබා ගත්තේය. මහනුවර පුරපති කේසර සේනානායක මහතා විසින් ශ්‍රී දළදා මාලිගා පරිශ්‍රයේදී අග්‍රමාත්‍යවරයා පිළිගන්නා ලදි. ශ්‍රී දළදා මාලිගාවේදී ඒ මහතා පිළිගනු ලැබුවේ විෂ්ණු දේවාලයේ බස්නායක නිලමේ මහේන්ද්‍ර රත්වත්ත මහතා විසිනි.
දන්ත ධාතූන් වහන්සේ වන්දනා කිරීමෙන් පසු අග්‍රාමාත්‍යවරයා, සිය සංචාරය සනිටුහන් කරමින් විශේෂ අමුත්තන්ගේ සමරු ග්‍රන්ථයේ සටහනක් තැබීය.
අනතුරුව මාධ්‍ය හමුවේ අදහස් පළ කළ ඒ මහතා මෙම තීරණාත්මක අවස්ථාවේදී රට මුහුණ දෙන අභියෝග ජය ගැනීම සඳහා රජය සමඟ අත්වැල් බැඳ ගන්නා ලෙසට සියලු දෙනාට ඇරයුම් කරන බව කීවේය.
රටේ සියලු පාර්ශව සමඟ මිත්‍රත්වයෙන් හා අන්‍යොන්‍ය විශ්වාසයෙන් යුතුව කටයුතු කරන්නේ රජය වන බැවින් හදිසි නීතිය සම්මත කරනු ලැබුවේ සියලු පාර්ශවයන්ගේ ආරක්ෂාව හා රට තුළ සාමය ස්ථාපිත කිරීම සඳහා යැයි ද සඳහන් කළේය.
ජනාධිපතිවරයා සහ තමන් මේ වන විට තානාපතිවරු ඇතුලු ජාත්‍යන්තර සබඳතා දැනුවත් කොට සහයෝගය ලබා ගැනීමේ වැඩසටහනක් ආරම්භ කර ඇතැයි ද අග්‍රමාත්‍යවරයා කීවේය. රටට නීතියක්, රීතියක් මෙන්ම නීතිය හා සාමය ක්‍රියාත්මක කිරීම සඳහා ක්‍රියාත්මක වන්නේ සියලු රට වැසියන්ගේ යහපත පිණිස යැයි ද ඒ මහතා අවධාරණය කළේය.
රජය පමණක් නොව පෞද්ගලික අංශයේ ක්‍රියාකාරීත්වය රටේ ජීවනාලිය වන බැවින් කඩාකප්පල්කාරී ක්‍රියා, නීතියෙන් බාහිර ක්‍රියා සිදුකිරීමට අවස්ථාව නොදෙන බව කීවේය.
අධිකරණයට ගරු කරන රජයක් වශයෙන් අධිකරණ තීන්දු හිසනමා පිළිගන්නා බවත් ඕනෑම අයෙකුට අධිකරණයේ පිහිට පැතීමේ අයිතියට ගරු කරන බව හෙතෙම සඳහන් කළේය.
තරුණ හඩට සවන් දෙමින් පාර්ලිමේන්තුව හරහා ඊට සුදුසු ගමන් මඟ සකස් කරන බව ද අග්‍රමාත්‍ය දිනේෂ් ගුණවර්ධන මහතා වැඩිදුරටත් ප්‍රකාශ කළේය.
මධ්‍යම පළාත් ආණ්ඩුකාර නීතිඥ ලලිත් යූ.ගමගේ, අමාත්‍ය කෙහෙළිය රඹූක්වැල්ල, පුරපති කේසර සේනානායක, පාර්ලිමේන්තු මන්ත්‍රීවරුන් වන මහින්දානන්ද අලුත්ගමගේ, දිලුම් අමුණුගම, සිසිර ජයකොඩි, වසන්ත යාපා බණ්ඩාර, උදයන කිරිඳිගොඩ, මහනුවර දිස්ත්‍රික් ලේකම් චන්දන තෙන්නකෝන් යන මහත්වරු ඇතුලු පිරිසක් මේ අවස්ථාවට එක්වූහ.
